Hukumomin Qatar sun ki amincewa da bukatar Shugaba Bola Tinubu na ziyartar kasar don gudanar da taron kasuwanci da zuba jari.
A wata wasika da gwamnatin Qatar ta aikewa ma’aikatar harkokin wajen kasarnan a ranar Alhamis ta bayyana cewa ba za ta iya karbar Mr Tinubu ba da kuma gudanar da taron da ake son yi a ranakun 2 da 3 ga watan Maris ba saboda rashin wata yarjejeniya ta doka tsakanin Qatar da Najeriya kan batun inganta zuba jari.
Har ila yau, ta lura cewa ma’aikatar kasuwancin ta na da wasu alkawurra a kwanakin da Mista Tinubu ke son ziyarta.
“Ofishin Jakadancin yana sanar da cewa ma’aikatar kasuwanci da masana’antu a Qatar ta nemi afuwar cewa ba za ta iya gudanar da taron kasuwanci da saka hannun jari ba kamar yadda bangaren Najeriya ya tsara” saboda “babu wata yarjejeniya da aka sanyawa hannu tsakanin kasar Qatar” da Tarayyar Najeriya kan inganta zuba jari da kariya,” wasikar da aka aike wa ma’aikatar harkokin wajen kasarnan a ranar 22 ga watan Fabrairu ta bayyana.
Ƙasar yankin Gulf ta ƙara jaddada cewa ministan kasuwanci da masana’antu, Sheikh Mohammed bin Hamad bin Qassim al-Thani “zai gudanar da ayyukan hukuma a wajen ƙasar a lokacin ziyarar da ke tafe” wanda ya sa ba zai samu ganawa da shugaban na Najeriya ba.
Ta kara da cewa jami’anta za su shagaltu sosai saboda Qatar na gudanar da nata “taron yanar gizo” a daidai lokacin da Mista Tinubu ya shirya kai ziyara.
“Kasar Qatar za ta dauki nauyin taron kolin yanar gizo a lokacin da aka ba da shawarar kuma hukumomin kasar za su damu da wannan taron,” in ji wasikar.
Kasawar da gwamnatin Qatar ta yi na sake tsara taron kasuwanci zuwa lokacin da ya dace, watakila, ya nuna rashin son kulla wani kawancen tattalin arziki da Najeriya.
A shekarar da ta gabata ne dai mahukuntan Hadaddiyar Daular Larabawa suka yi wa sanarwar cewa an dage haramcin bizar da aka yi wa ‘yan Najeriya bayan Mista Tinubu ya ziyarci shugaban UAE Mohammed bin Zayed Al Nahyan.
