Gwamnatin jihar Katsina ta bayyana kudurin ta na hada gwiwa da hukumar aikin hajji ta kasa (NAHCON), domin baiwa duk mahajjata masu karamin karfi damar cin gajiyar shirin ajiyar Hajjin a jihar.
Alhaji Mannir Yakubu, Mataimakin Gwamnan jihar ya bayyana hakan ne a taron wayar da kai na kwana daya kan shirin ajiyar kudin Hajji wanda aka gudanar a Katsina ranar Alhamis.
Mataimakin Gwamnan ya bayyana cewa shirin na bai wa mahajjata zabi da damar da za su yi tanadi tare da tsara aikin Hajjin ba tare da damuwa ba.
Don cimma wannan, ya ce gwamnatin jihar, kamar yadda NAHCON ta nema, ta ba da izinin ga mahajjatan jihar don sanya shirin a karkashin kulawar sabon sashin Kula da samar da ingantaccen tsarin gudanarwa don aiwatarwa.
Yakubu, duk da haka, ya shawarci Hukumar da sauran masu ruwa da tsaki kan hanzarta shiga wannan shiri don kauce wa masu damfarar yanar gizo wadanda za su iya amfani da damar da ba ta dace ba wajen damfarar masu amfani da layin.
Ya kuma yi kira ga NAHCON da ta sake farfado da ofishin shiyya a Katsina ko kuma kafa cibiyar wayar da kai don hada kai, inganta isar da sako yadda ya kamata da kuma inganta jin dadin mahajjata.
A nasa jawabin Alhaji Zikirullah Kunle Hassan, Shugaban zartarwa na NAHCON, ya ce ana aiwatar da shirin ne tare da hadin gwiwar bankin Jaiz Plc.
Ya yi bayanin cewa, an tsara tsarin Ajiye kudin Aikin ne domin taimakawa ma’aikata, Manoma, ‘yan kasuwa da dalibai domin yin ajiya a hankali cikin wani lokaci domin saukaka tafiya zuwa Saudi Arabiya don basu damar cika rukuni na biyar na Musulunci.
Alhaji Suleiman Nuhu Kuki, Darakta, na Hukumar Jin Dadin Alhazai ta Jihar Katsina, tun da farko, ya ce bitar wayar da kan mutane bin diddigin aiwatar da kudurorin da masu ruwa da tsaki suka cimma a Abuja a shekarar da ta gabata da nufin magance duk wata dabarar da ke cikin ayyukan makirci.
Kuki ya ci gaba da cewa, shirin idan har aka aiwatar da shi yadda ya kamata zai magance matsalolin tsara aikin Hajji, tsadar farashin kudin aikin Hajji, lokacin biyan kudi da kuma karfafa masu yin rajistar.
Shugaban hukumar ya kara da cewa, don haka ne aka samar da cibiyoyin rajista guda uku a matsayin rikon kwarya a Katsina, Funtua da Daura a shirye-shiryen tashi daga shirin Ajiye kufin Aikin Hajji a jihar.
