Abdullahi Ganduje, gwamnan Kano, ya ce sabbin masarautun da aka kafa a gwamnatinsa sun zo kenan.
A jawabinsa na bikin ranar ma’aikata ta 2023 a filin wasa na Sani Abacha, Kano, Ganduje ya ce an kafa masarautun ne domin samar da hadin kai da cigaba a jihar.
“Duk wanda ya ziyarci hedikwatar wadannan sabbin masarautun zai yarda da ni cewa mun kawo ci gaba a wadannan wuraren,” in ji shi.
“An kirkiro wadannan masarautun ne domin hadin kai, ci gaba, da tarihi, da kuma dawo da martabar cibiyoyin gargajiya. Mun ƙirƙire su ne don girmama mutanen wadannan yankuna.
“Ina so in tabbatar muku da cewa wadannan masarautun na dindindin ne, sun zo su zauna. Kuma duk wanda zai halaka su, Allah Ta’ala ba zai kawo shi jihar Kano ba. Muna ba ku tabbacin cewa an ƙirƙire su ne saboda ku, saboda ci gaban ku.
“Ko da ba a gwamnati muke ba, muna addu’a kuma za mu ci gaba da addu’ar Allah ya kare wadannan masarautun daga dukkan sharri. Na gode muku duka.”
A shekarar 2019, Ganduje ya rattaba hannu kan wata doka da ta samar da karin masarautu guda hudu a jihar, wanda hakan ya sa Lamido Sanusi, wanda shi ne Sarkin Kano a lokacin, ya mallaki kananan hukumomi 10 cikin 44.
Sabbin sarakunan sun hada da Aminu Ado Bayero na Bichi, Ibrahim Abubakar II na Karaye, Tafida Abubakar na Rano, da Ibrahim Abdulkadir na Gaya.
A watan Maris na 2020, gwamnan ya tsige Sanusi daga kan karagar sarautar Kano “saboda rashin mutunta doka da oda daga ofishin gwamna”.
Sai dai a wani faifan bidiyo da aka yada a kafafen sada zumunta a ranar Asabar, Rabiu Kwankwaso, dan takarar shugaban kasa na jam’iyyar New Nigeria Peoples Party (NNPP), ya ce yana da yakinin cewa Abba Yusuf, zababben gwamnan jihar, zai samu hikimar sake duba tsige Sanusi daga karagar mulki da kuma warware “kalubale” a jihar.
