Shugaban kasa, Manjo Janar Muhammadu Buhari (mai ritaya) ya roki majalisar dattijai da ta amince da nadin sabbin alkalan kotun koli mutum takwas.
Wasikar wacce Shugaban Majalisar Dattawa, Ahmad Lawan ya karanta a zaman majalisar na ranar Talata, ta ce nadin ya dogara ne da shawarar da Majalisar Kula da Harkokin Shari’a ta Kasa ta bayar.
Buhari ya ce abin da yayi, ya kasance “bisa ga Sashe na 231 (2) na Kundin Tsarin Mulki na 1999, kamar yadda aka yi wa kwaskwarima, kuma bisa shawarar da Majalisar Kula da Harkokin Shari’a ta Kasa ta bayar dangane da matsayinsu da kuma matsayinsu a Kotun daukaka kara.”
Wadanda aka zaba sun hada da Lawal Garba (Arewa maso Yamma), Helen Ogunwumiju (Kudu maso Yamma), Abdu Aboki (Arewa maso Yamma), da M. M. Saulawa (Arewa maso Yamma).
Sauran sun hada da Adamu Jauro (Arewa maso Gabas), Samuel Oseji (Kudu Maso Kudu), Tijjani Abubakar (Arewa maso Gabas), da Emmanuel Agim (Kudu maso Kudu).
Shugaba Buhari ya kuma nemi majalisar dattijai ta amince da nadin wasu jakadun da ba na aikin ba.
Su ne Muhammad Manta (Niger) da Yesufu Yunusa (Yobe).
Wadanda aka zaba, a cewar Buhari, za su maye gurbin Air Commodore Peter Gana (mai ritaya) da Alhaji Yusuf Muhammad, wadanda tun farko aka mika su ga Majalisar Dattawa don tabbatar da su.
Har ila yau a wata wasika a ranar Talata, Shugaban ya nemi Majalisar Dattawa ta amince da nadin Isa Kwarra daga Jihar Nasarawa a matsayin Shugaban Hukumar Kidaya ta Kasa, da kuma wasu 11 a matsayin kwamishinoni.
Daga Comr Haidar Hasheem Kano
