Abdullahi Sule, Gwamnan Jihar Nasarawa ya bayyana dalilin da ya sa ya sanyawa tagwayen ‘Ya ‘yansa sunayen Shugaba Muhammadu Buhari da Sanata Umar Tanko Al-Makura.
Gwamnan ya ce ya yanke shawarar sanya wa ‘ya’yansa sunan Buhari da Al-Makura ne bisa la’akari da girmamawar da yake yi wa shugabannin biyu.
Ya bayyana hakan ne a ranar Talata a wajen bikin sanya sunan tagwayen da matarsa ta biyu, Hajiya Farida Abdullahi Sule ta Haifa masa.
An gudanar da bikin ne a Fadar mahaifin Gwamna, Sarkin Gude a karamar hukumar Akwanga, Alhaji Sule Bawa.
“Na sanya musu sunan Shugaba Muhammadu Buhari da Sanata Umar Tanko Al-Makura saboda karramawa da girmamawar da nake yi wa shugabannin biyu.
“Na yi alƙawarin ci gaba da fafutukar neman ingantaccen ilimi ga ɗaukacin yara a jihar,” in ji shi.
Taron ya samu halartar musamman, Mataimakin Gwamnan Jihar, Dr Emmanuel Akabe, Sen. Abdullahi Adamu, da Kakakin Majalisar Dokokin Jiha, Alh. Ibrahim Balarabe Abdullahi.
