A ranar Lahadin da ta gabata ne jirgin Max Air ya yi hatsari a filin jirgin saman Nnamdi Azikwe da ke Abuja.
An ce jirgin ya taso ne daga Yola na jihar Adamawa lokacin da lamarin ya faru.
Faithful Hope-Ivbaz, mai magana da yawun hukumar kula da filayen jiragen sama ta Najeriya (FAAN), ya tabbatar da faruwar lamarin amma ya ki bayar da karin bayani.
Kamar yadda Dailytrust ta ruwaito, lamarin ya faru ne bayan tayar jirgin ta fashe ta kama da wuta.
Hukumar ceto da kashe gobara (ARFFS) da ke filin jirgin ta ce ta kashe gobarar yayin da fasinjojin suka sauka lafiya daga jirgin.
An rufe titin jirgin na wani dan lokaci har sai an kwashe jirgin.
Mike Ogirima, tsohon shugaban kungiyar likitocin Najeriya (NMA), wanda lamarin ya faru a gaban idonsa, ya ce tayar Jirgin ta fashe ne bayan tashin ta a filin jirgin saman Yola.
“Mun gode wa Allah. Har yanzu muna kan titin jirgi kuma matukin jirgi ya tabbatar mana. Ya kira matattakalar, kuma a yanzu muna tafe daga titin jirgin domin a dauke mu zuwa ginin filin jirgin da ke zauren isowa,” inji Ogirima.
“Mun yi wa Allah godiya saboda mun shaida yadda aka fiddo taya daga filin jirgin sama na Yola kuma mun shiga taron addu’a. Ban taba sanar da shi a matsayin likitan fida ba don kada a firgita amma mun gode wa Allah.”
Har yanzu dai kamfanin jirgin bai fitar da wata sanarwa a hukumance kan lamarin ba.
A watan Agustan 2022, wani jirgin sama na Air Peace zuwa Owerri ya yi saukar gaggawa a Legas saboda yajin aiki.
Jirgin wanda ke kan hanyarsa ta zuwa Owerri, bai iya sauka ba, sakamakon tasirin yajin aikin da ya yi, don haka ya koma Legas domin saukan gaggawa.
‘ZAMU K’ARA BINCIKE A JIRGIN’
Kamfanin jirgin a cikin wata sanarwa da ya tabbatar da faruwar lamarin, ya ce akwai fasinjoji 143 da jariri daya a cikin jirgin da ya sauka a Abuja daga Yola da karfe 3 na rana.
Max Air ya ce jirgin, ya samu fashewar tayoyi biyu a lokacin da ya sauka a Abuja kuma nan take tawagar gaggawar ta kai dauki.
“Mun yi farin cikin bayar da rahoton cewa dukkan fasinjoji da ma’aikatan da ke cikin jirgin suna cikin koshin lafiya. Kamfanin jirgin ya dauki dukkan matakan da suka dace don tabbatar da cewa fasinjojin sun samu kwanciyar hankali kuma ana kula da su a wannan lokacin,” in ji sanarwar.
“An kai su tashar jirgin da kayansu.
“Ana maye gurbin tayoyin jirgin kuma jirgin zai yi taksi zuwa tudu don ci gaba da bincike kafin a sake shi don tafiya a nan gaba.”
