Kazo mu ha’du mu ha’da Kai domin ciyar da jiharmu ta Kano a tare ~Gwamna Abba ya Fa’dawa Gawuna.
Yayin da Kotun Koli ta kawo karshen rikicin Gwamnan Kano bayan tabbatar da Alhaji Abba Kabir Yusuf a matsayin zababben Gwamnan Jihar, Gwamna (Alhaji Abba Kabir Yusuf) ya mika hannun abokantaka da abokin hamayyarsa na jam’iyyar APC, Dakta Nasiru Yusuf Gawuna domin ci gaban jihar Kano.
Gwamnan wanda ke cike da farin ciki ya bayyana hakan ne a lokacin da yake zantawa da manema labarai a harabar kotun koli da ke Abuja kai tsaye bayan zartar da hukuncin da ya sauya hukuncin da kotun sauraron kararrakin zabe da na daukaka kara suka yi a baya da kuma na tsawon watanni bakwai.
A cewar Gwamna Abba, “a matsayina na mai bin tafarkin dimokuradiyya na gaskiya kuma mai son ci gaba, ina kira ga abokin hamayya na da magoya bayansa da su ba ni hadin kai wajen fafutukar ganin an raya jiharmu ta Kano mai kauna domin ci gaban al’ummarta.
“Mutanen Kano na bukatar shugabanni masu hangen nesa Amana da kishi, da jajircewa wajen bullo da ayyuka, manufofi da tsare-tsare wadanda suka shafi rayuwarsu kai tsaye ta kowane bangare da kuma lunguna da sako na jihar.” Gwamna Abba, ya bayyana.
Alhaji Abba Kabir ya godewa Allah madaukakin sarki da ya samu nasara, inda ya yabawa al’ummar Kano bisa goyon bayan da suka yi da jajircewa da addu’o’i da sadaukarwa da jajircewa wajen tabbatar da abin da suka zaba da kuma alkalan kotun koli kan daukaka darajar shari’a.
Ya kuma yabawa shuwagabannin NNPP a kowane mataki musamman jagoran tafiyar Kwankwasiyya na duniya Sen. Rabi’u Musa Kwankwaso bisa jajircewarsa da goyon bayan da ya bayar a lokacin gwaji.
Gwamnan ya lura da jin dadin yadda shugaban kasa Bola Ahmed Tinubu da mataimakinsa, Kashim Shattima ba su tsoma baki a hukuncin da kotun kolin ta yanke ba duk da matsananciyar matsin lamba daga bangarorin da ba su ji dadi ba.
