Masu Garkuwa Da Mutane Sun Bude Wuta Ga Wadanda Suka Kai Musu Kudin Fansa Sun Kashe Daya Daga Ciki Tare Da Kashe Wanda Akayi Garkuwa Da Shi Bayan Sun Karbi Kudin Fansa Miliyan 2.5m A Jigawa.
Wasu masu garkuwa da mutane sun kashe wani matashi dan shekara 35 mai suna Abubakar Mutari bayan sun karbi kudin fansa N2.5m.
Jaridar DAILY POST ta ruwaito cewa ‘yan bindiga sun sace dan dan majalisar dokokin jihar Jigawa mai wakiltar karamar hukumar Auyo, Hon. Isiyaku Sani.
Wata majiya da ke kusa da marigayin ta tabbatar wa DAILY POST cewa masu garkuwan sun nemi miliyan N2.5m a matsayin kudin fansa kafin su sako shi.
Ya bayyana cewa masu garkuwan sun kashe daya daga cikin dangin wanda aka kashe tare da raunata wanda ya dauki kudin ga masu satar a hanyar Gujunju zuwa yankin Gagarawa.
“Dukkanin su‘ yan uwan wanda aka kashe din ne da aka tura su kai kudin ga masu garkuwar a hanyar Gagarawa.
“Sun bude musu wuta ne bayan sun karbi kudin ba tare da sakin wanda aka kashe ba,” in ji shi.
Daya ya mutu nan take yayin da dayan kuma aka kai shi asibitin koyarwa na Aminu Kano domin yi masa magani bayan raunin da ya samu daga harbin bindiga. ”
Kakakin rundunar ‘yan sanda a jihar, SP Abdu Jinjiri, ya tabbatar da faruwar lamarin ga jaridar DAILY POST.
Ya bayyana cewa lamarin ya faru ne da misalin karfe 2:00 na dare na ranar Asabar lokacin da dangin wanda aka sace din suka je kauyen Kwanar Mele da ke karamar hukumar Gumel don kai kudin fansa da suka tattauna da masu garkuwar ba tare da sanin ‘yan sanda ba.
Ya ce masu garkuwan sun kashe dan uwan ne bayan sun karbi kudi kuma ba a saki wanda suka yi garkuwar da shi ba.
Ya ce ‘yan sanda sun garzaya inda lamarin ya faru sannan suka kwashe wadanda lamarin ya rutsa da su zuwa asibiti inda aka tabbatar da cewa wani Abubakar Mukhtar ya mutu sannan dayan kuma Abdullahi Isiyaku ya ji mummunan rauni.
Jinjiri ya ce an kama mutane hudu a yankin don yi musu tambayoyi sannan kuma an gano babur bayan wadanda ake zargin sun tsere.
Ya ce har yanzu ana gudanar da bincike kan lamarin.
