An Kashe Amir Kuraish da Sauran Kwamandojin B’Haram a Tafkin Chadi.
Da yawa daga cikin manyan ‘yan ta’addan Boko Haram da na Yammacin Afirka (ISWAP) da suka hada da Abu Usman, Alhaji Shettima, Modu Mainok, Bukar Gana, Abu Summayya, Amir Taam da Amir Kuraish, da sauransu, sojojin Najeriya sun kashe su, a Tafkin Chadi.
An tattara cewa sojojin na Super Camp Malumfatori, sun kashe manyan shugabannin ‘yan ta’adda a yayin da suke gudanar da ayyukansu a yankin, a jihar Borno.
Wata sanarwa da Manjo Janar John Enenche ya fitar, ta nuna cewa harin da aka kai wa ‘yan kungiyar ta B / Haram da mayakan ISWAP na ci gaba da kai hare-haren wuce gona da iri kan ayyukan ta’addanci da sauran laifuka daban-daban a Arewa maso Gabas.
Enenche, Kodinetan sashen yada labarai na bangaren tsaro (DMO), a cikin sanarwar, ya ce aikin ya kai ga lalata sansanonin ‘yan ta’adda da dama da maboyar su da ke Tunbun Gini, Tunbun Nbororo, Tunbun Kayoma, Tunbun Kaza, da Tunbun Fulani a gefen Tafkin Chadi a karamar hukumar Kukawa.
A cewarsa: “Sojojin Najeriya da ke aiki tare da sauran hukumomin tsaro sun himmatu sosai wajen kawo karshen tayar da kayar baya da sauran kalubalen tsaro a kasar.
“Yayin da mutanen Arewa maso Gabas ke sake tabbatar musu da jajircewar rundunar don kare rayuka da dukiyoyin da ke yankin, an kuma karfafa musu gwiwa su ci gaba da ba sojojin hadin kai da bayanai na gaskiya a kan kari wanda zai taimaka musu wajen gudanar da ayyukansu. ”
