Abin Tausayi: Wani Soja Da Ke Yaki Da Boko Haram Ya Kashe Kansa, Ya Bar Wasika Ga Matarsa.

“Ya harbi kansa ne a kai kuma ya mutu nan take kafin sauran sojoji suyi hanzarin taimaka masa,” in ji wata majiyar soja.

Wani soja da ke yaki da masu tayar da kayar baya na kungiyar Boko Haram a yankin Arewa maso Gabas ya kashe kansa.

A cewar jaridar TheCable, sojan, wani kofur ne na rundunar soji ta 27 Task Force Brigade a Buni Gari, karamar hukumar Gujba na jihar Yobe, ya kashe kansa ne a ranar Alhamis yayin da yake gudanar da aikinsa.

“Ya harbi kansa ne a kai kuma ya mutu nan take kafin sauran sojoji suyi hanzarin taimaka masa,” in ji wata majiyar sojoji da ta shaida wa jaridar.

An kuma ce sojan ya bar wa matarsa ​​wasika.

An dauke gawarsa kuma majiyoyi sun ce ana ci gaba da bincike kan abin da ya haifar da lamarin.

A watan Yuli ma, wani soja a bataliyar sojoji ta 202 a Bama, jihar Borno, ya kashe wani Laftanar, wanda bai ba shi izinin ziyartar danginsa ba.

A shekarar 2019 ma, wani soja ya rataye kansa a Abuja.

Hakanan a cikin 2017, wani soja ya kashe kansa bayan ya kashe na gaba da shi.

Leave a Reply

Your email address will not be published.