‘Yan fashin da ke cikin dazukan Arewa sun fara ajiye kudi don mallakar makamai masu linzami – Sheikh Ahmad Gumi.

Suna siyan makamai ne da kuɗin satar mutanen da suka samu, su ba kamar gwamnoninmu bane da suke satar kudi, ba sa son kuɗi, awurinsu saniya ta fi kudi. – in ji Sheikh Gumi.

Shahararren malamin addinin Musulunci, Sheik Ahmad Abubakar Gumi, ya bayyana cewa ‘yan fashi da ke aiki a dazukan jihohin arewacin ƙasarnan na shirin mallakar makamai masu linzami don kawar da hare-haren da sojoji ke kaiwa.

Gumi, wanda kwanan nan ya shiga dazuzzuka a jihar Zamfara, don tattaunawa da ‘yan ta’addan da suka kashe kuma suka raba mutane da yawa da gidajensu, ya ce huldarsa da’ yan fashin ya nuna cewa suna yin satar mutane tare da karbar kudin fansa da nufin tara kudi don sayen makamai. .

Shehin malamin ya fadawa jaridar Punch cewa ‘yan bindigar wadanda abin ya shafa ne da ke neman adalci, yana mai cewa yana da matukar muhimmanci ga gwamnati ta sadu da su cikin gaggawa kafin su zama masu tsattsauran ra’ayin addini kuma ba za a iya shawo kansu kamar ‘yan Boko Haram ba.

Malamin ya ce: “Wadannan mutane su ne wadanda aka fara kamawa da satar shanu, wadanda suka rasa shanunsu duka ga barayin saboda a lokacin, barayin suna da bindigogi. To, a lokacin da suka rasa dabbobinsu, sai suka shiga (barayin) kuma suka fara satar mutane.

“A zahiri, yawancin sace-sacen mutane, su (‘yan fashin) suna yi ne don su sami makamai. Yanzu suna kokarin siyan makamai masu linzami, na kariya daga jiragen sama.

“Wannan ya rigaya ya fara zama cikakken tashin hankali kuma ya kamata mu dakatar da hakan. Kuma abin da muke tsoro shi ne idan sun zama masu tsattsauran ra’ayi na addini, zai haifar da wani yanayi, kuma zai yi matukar wahala a iya sarrafawa. Kun ga abin da Boko Haram ta zama. ”
Ya ce ba ‘yan siyasa ko masu hadin gwiwa na kasashen waje ke daukar nauyin’ yan fashin ba.

A cewarsa, suna samu manyan makamai ‘yan fashin da kudin sata ba, yan siyasa ko wasu kasashen waje ne suke ba su ba.

Ya ce: “Kamar yadda na fada, suna karbar kudin fansa don sayen makamai. Dubi makiyaya a jihohin Oyo da kudu maso gabas. Ba sa siyan manyan gine-gine, ba sa hawa Mercedes; har yanzu suna cikin daji. Ba sa son kuɗi. Shanunsu suke so, ba kudi ba.

“Suna yin hakan ne (sacewa) don tara kudi don kawai su sayi makamai don tunkarar jirage masu saukar ungulu da jiragen sama da kuma afkawa duk wanda zai kawo musu hari.

“Dole ne ku fahimci ilimin halin mutanen nan. Ba kamar gwamnoninmu bane da suke satar kudi. Ba sa son kuɗi. A wurinsu, saniya ta fi kudi. ”

Gumi ya yi ikirarin cewa ‘yan bindigar suna da hadin kai a cikin sojojin.

Ya ce: “Suna da masu aiki tare a ko’ina – a cikin sojoji, a ko’ina. Daya daga cikinsu ta ce, ‘Ko wannan barayin shanun, ba mu da tirelolin da za mu kai shanun zuwa inda ake yanka su. Ba mu da wurin yanka. ‘

“Don haka, akwai mutanen da suke (aiki tare da su). Hatta sace mutane, sun ce, ‘Ba mu san wadannan mutanen ba; mutanen gari ne za su ce mana wani mutum yana da kudi. ”

Shehin malamin ya yi gargadin cewa idan gwamnati ta gaza daukar matakin gaggawa, ‘yan fashi, wanda, a yanzu, galibi ya takaita ga Arewa, shi ma zai bazu zuwa Kudu.

Gumi ya ci gaba da cewa hanya mafi kyau ta magance matsalar ‘yan ta’addan ita ce ta hanyar tattaunawa da yin afuwa ga’ yan ta’addan maimakon amfani da karfin soja.

Ya ce: “Wadannan mutane (‘ yan fashin) sun san yadda za su tsara kansu kuma su kare kansu kuma sun fara kai hare-hare kauyuka kewaye. Da zarar ka taba daya daga cikinsu, sai dukkan su su taru su kai hari wani kauye. Suna tattara kansu ta cikin daji. Don haka, ba kyau a far musu, magana ta gaskiya.

“Hausawa suna shan wahala saboda haka suka daina afkawa Fulani makiyaya. Don haka, bai kamata mu auka musu ba. Yakamata mu kwantar musu da hankali kawai kuma mutane ne masu kunya. Idan kun haɗu da su, suna da kunya sosai.