Sojojin Najeriya bakwai da suka hada da dan sanda daya, da kuma ‘yan banga 20 da suke yin yaki tare da sojoji sun mutu a hannun ‘yan bindiga a jihar Zamfara.
An kashe sojoji da ’yan bangar ne a lokacin da ‘yan fashin suka yi musu kwanton bauna a lokacin da suke gudanar da sintiri a kafa don kawar da sansanonin ‘yan fashi da makami a jihar.
Daraktan yada labarai na tsaro, Manjo Janar Edward Buba yayin da yake tabbatar da asarar rayukan, ya kuma ce an sanar da batan wasu sojoji biyu a yayin harin.
Ya bayyana hakan ne a cikin wata sanarwa mai taken, ‘Yan bindiga sun ci gaba da kashe rayuka yayin da suke kai wa Sojojin FOB Kango hari.
Buba ya ce, “A ranar 24 ga watan Yuli, 2023, ‘yan bindiga sun kai hari kan dakarun kungiyar ta FOB Kango a lokacin da suke sintiri a kafa.
“Sojojin sun dakile harin inda suka yi sanadin jikkatar ‘yan bindigar.
“Sojoji sun samu raunuka a cikin lamarin kamar haka: An kashe jami’in tsaro 1, sojoji 5, jami’an NPF 1 da kuma ‘yan banga 20 da suka hada kai da sojoji domin dakile harin.
“Sojoji 2 sun bata a wajen aiki.
“An ajiye gawarwakin wadanda suka mutu a asibitin kwararru na Yerima Bakura Gusau a jihar Zamfara.
“Ana boye takamaiman bayanan wadanda suka mutu har sai an kammala ayyukan gudanarwa don sanar da iyalansu.
“Har yanzu ana ci gaba da gudanar da bincike da ceto.
“An karfafa FOB ne biyo bayan barazanar ramuwar gayya da ‘yan fashin suka yi saboda irin hasarar da suka yi.
“Sojoji sun shirya tsaf domin kara kai farmaki kan ‘yan fashin.”
