Gwamna Dikko Radda ya bukaci karin tallafi daga mazauna yankin domin kai wa ‘yan fashi da makami da sauran miyagun ayyuka farmaki a Katsina.
A sakonsa na sabuwar shekara a ranar Litinin, gwamnan ya ce gwamnati ta dukufa wajen shawo kan matsalar tsaro da sauran kalubalen da ke addabar Katsina.
A wata sanarwa da babban sakataren yada labaran sa Ibrahim Kaula-Mohammed ya fitar, Radda ya bukaci al’ummar jihar da su hada kansu tare da kulla alaka mai karfi da nufin tunkarar kalubalen jihar.
Mista Radda ya gode wa jama’a bisa hadin kai da goyon bayan da ya samu na kafa kungiyar kula da al’umma ta Katsina, wadda aka kafa domin magance matsalar rashin tsaro.
Mista Radda ya ba da tabbacin cewa “gwamnati, tare da jama’a, za su magance matsalar rashin tsaro.”
Ya kuma bayyana yadda gwamnatinsa ta himmatu wajen inganta hada kai, bunkasar tattalin arziki da kuma hanzartar da ci gaba.
Don haka gwamnan ya shawarci al’ummar Katsina da su yi amfani da damar da aka samar domin rage zaman kashe wando da talauci da dora jihar a kan turbar girma.
Ya bayyana fatansa cewa jihar za ta kasance mai girma da wadata a shekarar 2024.
Mista Radda ya bukaci jama’a da kada su yi kasa a gwiwa wajen goyon bayan gwamnati a kokarinta na magance kalubalen da ke addabar Katsina gaba daya.
